सावंतवाडी शहरात दुचाकींच्या अपघातानंतर पोलिसांची अल्पवयीन दुचाकीचालकांच्या विरोधात मोहीम

सावंतवाडी – शहरात ७ डिसेंबर या दिवशी सकाळी २ दुचाकींमध्ये अपघात झाला. या अपघातात दोघे जण गंभीर घायाळ झाले. त्यांना तात्काळ अधिक उपचारासाठी बांबोळी, गोवा येथील शासकीय रुग्णालयात भरती करण्यात आले.

या अपघाताची गंभीर नोंद घेत पोलिसांनी महाविद्यालयीन आणि अल्पवयीन दुचाकी चालकांच्या विरोधात मोहीम उघडली आहे. या वेळी अनेकांच्या गाड्या कह्यात घेत संबंधितांवर दंडात्मक कारवाई करण्यात आली. अशा प्रकारे अल्पवयीन मुलांकडे दुचाकी आढळल्यास त्या मुलांसह त्यांच्या पालकांवरसुद्धा कारवाई करण्यात येणार आहे, अशी चेतावणी पोलीस निरीक्षक शंकर कोरे यांनी दिली. दुचाकींच्या अपघातानंतर पोलीस निरीक्षक कोरे यांनी सहकार्‍यांच्या साहाय्याने स्वत: कारवाईची मोहीम राबवली.