प्रांताधिकारी यांच्या पुढाकारामुळे दहिवडी (जिल्हा सातारा) येथील शासकीय जागेचा होणार कायापालट !

‘हरित वसुंधरा माण-खटाव’ समितीमध्ये विविध क्षेत्रांतील मान्यवरांचा सक्रिय सहभाग

सातारा, ८ सप्टेंबर (वार्ता.) – माण (जिल्हा सातारा) येथील प्रांताधिकारी कार्यालयासमोर विविध शासकीय विभागांची ६ हेक्टर जागा आहे. अनेक वर्षांपासून ही जागा विनावापर पडून होती. या जागेत घाणीचे साम्राज्य पसरले होते; मात्र सध्या या जागेचा कायापालट करण्याचे ध्येय प्रांताधिकारी शैलेश सूर्यवंशी यांनी घेतले आहे. यासाठी ‘हरित वसुंधरा माण-खटाव’ या नावाने एक विनाशासकीय समिती गठीत करण्यात आली आहे. याचे अध्यक्ष माण-खटावमधील नामवंत स्त्रीरोग तज्ञ डॉ. प्रदीपकुमार पालवे असून बालरोग तज्ञ डॉ. बोराटे, डॉ. करणे, वैद्य डोंबे, सर्वश्री नंदकुमार खोत, सुनील पोळ, संदीप खाडे, अजित पवार, बलवंत पाटील आदी मान्यवरांचा समावेश आहे.

प्रांताधिकारी शैलेश सूर्यवंशी यांनी विविध शासकीय कार्यालयांकडून लेखी अनुमतीपत्रे घेतली, तसेच यासाठी लागणारे साहाय्यही संबंधितांकडून अर्ज भरून स्वीकारले. हा उपक्रम पूर्ण व्हावा यांसाठी समाजातील दानशूर व्यक्ती पुढे येत असून कुणी रोख रक्कम, तर कुणी वस्तू रूपाने साहाय्य करत आहे. या जागेचा कायापालट पाहून ग्रामस्थ भारावून गेले असून श्रमदानासमवेत अर्थसाहाय्याचा ओघही वाढत आहे. त्यामुळे प्रांताधिकारी शैलेश सूर्यवंशी, स्त्रीरोग तज्ञ डॉ. प्रदीपकुमार पालवे आणि सहकारी यांचे तालुक्यातून कौतुक होत आहे. वैद्यकिय व्यवसायामध्ये व्यस्त असूनही स्त्रीरोग तज्ञ डॉ. प्रदीपकुमार पालवे आणि अन्य सहकारी डॉक्टर, तसेच व्यापारी यांनी सामाजिक उपक्रमासाठी वेळ दिल्यामुळे सर्वांनाच उत्साह आलेला आहे, असे मत ग्रामस्थांनी व्यक्त केले आहे.