५१ टक्के आध्यात्मिक पातळीचा उच्च स्वर्गलोकातून पृथ्वीवर जन्माला आलेला वणी (जिल्हा यवतमाळ) येथील चि. अद्वैत सचिन मत्ते (वय २ वर्षे ९ मास) !

उच्च लोकातून पृथ्वीवर जन्माला आलेली दैवी बालके म्हणजे पुढे हिंदु राष्ट्र चालवणारी पिढी ! या पिढीतील चि. अद्वैत सचिन मत्ते हा आहे !

वणी (जिल्हा यवतमाळ) चि. अद्वैत सचिन मत्ते याच्या कुटुंबियांना जाणवलेली त्याची गुणवैशिष्ट्ये पुढे दिली आहेत.

१. गर्भधारणेनंतर ९ मास कोणताही त्रास न होणे

‘चि. अद्वैतच्या गर्भधारणेनंतर ९ मासांपर्यंत मला कुठलाही त्रास झाला नाही. या कालावधीत मी सनातनचा ‘आपले बाळ’ हा ग्रंथ आणि ‘ग्रामगीता’ यांचे वाचन केले.’ – सौ. प्रिया मत्ते (आई)

२. जन्म ते ६ मास

२ अ. हातांच्या बोटांच्या मुद्रा करणे : ‘अद्वैत झोपेत आणि जागेपणीही हातांच्या बोटांच्या मुद्रा करत असे. त्या वेळी ‘तो ध्यानस्थ योगी आहे’, असे मला वाटत असे.

२ आ. अद्वैत रडत असतांना ‘भक्तीगीत’ किंवा ‘हनुमान चालिसा’ लावल्यास तो शांतपणे झोपत असे.

२ इ. अद्वैत झोपेतून नेहमी हसत उठतो.

३. वय ६ ते १० मास

३ अ. १० व्या मासात अद्वैतला दात आले. त्या वेळी त्याला कुठलाही त्रास झाला नाही.

३ आ. सात्त्विक गोष्टींची आवड

१. संध्याकाळी देवाजवळ दिवा लावल्यावर अद्वैत स्वतःहून देवाला नमस्कार करतो. त्याला ‘श्रीराम जय राम जय जय राम ।’ हा नामजप ऐकतांना पुष्कळ आनंद होतो.

२. टाळ, डमरू आणि बासरी यांच्या समवेत खेळायला त्याला पुष्कळ आवडते.

३. अद्वैतला देवतांची चित्रे आवडतात. तो प्रत्येक देवतेचे चित्र ओळखतो. बाहेर फिरायला गेल्यावर गाय आणि देऊळ दिसताच तो हात जोडून नमस्कार करतो.

४. वय १ ते २ वर्षे

४ अ. व्यवस्थितपणा : घरात पाणी सांडलेले दिसताच अद्वैत कापड घेऊन लगेच ते पुसण्याचा प्रयत्न करतो. बाहेर जातांना घातलेली चप्पल घरी आल्यावर बाहेरच व्यवस्थित काढून ठेवतो. स्वतःचे हात अस्वच्छ दिसल्यास लगेच धुऊन स्वच्छ करतो.’

– श्री. सचिन आणि सौ. प्रिया मत्ते (वडील-आई)

४ आ. ‘अद्वैतची बुद्धी तल्लख आहे. घरी आलेल्या पाहुण्यांना तो स्वतःहून नमस्कार करतो, तसेच आम्हा दोघांनाही शिरसाष्टांग नमस्कार करतो.

४ इ. नामजपादी उपाय करणे : अद्वैत भीमसेनी कापूर आणि अत्तर लावतो. तो देवघरासमोर बसून मुद्रा करून नामजपादी उपाय करतो. तो स्वतःला कुंकवाचा टिळा लावण्यास सांगतो.

‘हे श्री गुरुदेवा, ‘असा जीव आमच्या कुटुंबात जन्माला घातला’, यासाठी आम्ही आपल्या चरणी अनंत कोटी कृतज्ञ आहोत.’

– श्री. वामन आणि सौ. निर्मला मत्ते (आजोबा-आजी)

५. स्वभावदोष

‘हट्टीपणा आणि मोठ्याने ओरडणे’ – श्री. सचिन आणि सौ. प्रिया मत्ते (नोव्हेंबर २०२०)