अल्पवयीन मुलीचा पाठलाग करून तिची छेड काढणार्‍या युवकाला ४ वर्षांच्या कारावासाची शिक्षा !
मुंबई – अल्पवयीन मुलीचा पाठलाग करणे, तिला डोळा मारणे आणि पैशांचे आमीष दाखवून तिला जवळ बोलावणार्‍या २८ वर्षांच्या युवकाला विशेष पोक्सो न्यायालयाने ४ वर्षांची शिक्षा ठोठावली आहे. दोषी युवक आतापर्यंत ४ वर्षे कारागृहात असल्यामुळे न्यायालयाने त्याला आणखी ३ दिवसांची साधी शिक्षा ठोठावली आहे. (असे किती नागरिक न्यायासाठी रखडले असतील ? ‘न्याय’ या शब्दाला खर्‍या अर्थाने सार्थकी करण्यासाठी न्यायव्यवस्था गतीमान व्हायला हवी. यासाठी केंद्रशासनाने ठोस उपाययोजना करणे अपेक्षित आहे. – संपादक)
या प्रकरणी ६ मार्च २०१७ या दिवशी मुलीच्या आईने देवनार पोलीस ठाण्यात तक्रार केली होती. मुलगी दूध आणण्यासाठी घराबाहेर गेली असतांना आरोपीने तिच्याशी गैरप्रकार केला. या प्रकरणी पोलिसांनी गुन्हा नोंदवला. पीडित मुलीच्या कुटुंबियांनी पूर्ववैमनस्यातून आरोपीला गोवल्याचे आरोपीच्या अधिवक्त्याने न्यायालयात म्हटले; मात्र त्याविषयी कोणतेही ठोस पुरावे त्यांना न्यायालयात सादर करता आले नाहीत.