पूरामुळे बंद असलेला पुणे-बेंगळुरू राष्ट्रीय महामार्ग सर्वांसाठी खुला !
सातारा, २८ जुलै (वार्ता.) – गत ४ ते ५ दिवसांपासून पुराच्या पाण्यामुळे पुणे-बेंगळुरू राष्ट्रीय महामार्गावरील बंद असलेली वाहतूक आता सर्वांसाठी खुली करण्यात आली आहे. पुराचे पाणी ओसरू लागले असल्यामुळे आता वाहतूक हळूहळू पूर्वपदावर येत आहे. महामार्गावर अडकून पडलेल्या वाहनचालकांना भोजन आणि निवार्‍याची व्यवस्था जिल्हा पोलीस अन् प्रशासन यांच्या वतीने करून देण्यात आली होती. आनेवाडी, तासवडे टोलनाका तसेच विविध गावांच्या सीमेत वाहने थांबवण्यात आली होती, तसेच सातारा जिल्ह्यातील वाहतूकदार संघटनांनीही शिरवळ ते शेंद्रे या भागातील महामार्गावर अडकून पडलेल्या वाहतूकदारांची भोजनाची व्यवस्था केली.