विधानसभेत ‘राजदंड’ पळवण्याचा प्रयत्न केल्याप्रकरणी आमदार रवी राणा यांना सभागृहाबाहेर काढले !

मुंबई, ६ जुलै (वार्ता.) – विधानसभेत आमदार रवी राणा यांनी शेतकर्‍यांच्या सूत्रावरून गोंधळ घालत ६ जुलै या दिवशी ‘राजदंड’ पळवण्याचा प्रयत्न केला. यामुळे तालिका अध्यक्ष भास्कर जाधव यांनी आमदार राणा यांना सभागृहाबाहेर काढण्याचे आदेेश दिले.

आमदार राणा हे तालिका अध्यक्ष जाधव यांना निवेदन देण्यासाठी अध्यक्षांच्या समोरील मोकळ्या जागेत उतरले होते. या वेळी अध्यक्षांनी ‘अशा प्रकारे निवेदन देता येत नाही. तुम्ही ‘स्टंटबाजी’ करू नका. तुम्हाला योग्य वेळी बोलण्याची संधी दिली जाईल’, असे ठणकावून सांगितले; मात्र तरीही राणा यांनी ‘राजदंड’ पळवण्याचा प्रयत्न केला. त्यामुळे अध्यक्षांनी आमदार राणा यांना सभागृहाबाहेर काढण्याचे आदेश दिले.