सनातनची सर्वांगस्पर्शी आध्यात्मिक ग्रंथसंपदा सर्व भारतीय आणि विदेशी भाषांमध्ये प्रकाशित व्हावी, यासाठी ग्रंथनिर्मितीच्या व्यापक सेवेत सहभागी व्हा !
विविध भारतीय भाषांचे आणि इंग्रजीचे ज्ञान असणारे साधक, वाचक अन् हितचिंतक यांना आध्यात्मिक ज्ञानदानाच्या कार्यात सहभागी होण्याची अमूल्य संधी !
परात्पर गुरु डॉ. आठवले संकलित करत असलेल्या ग्रंथांपैकी मे २०२१ पर्यंत केवळ ३३८ हून अधिक ग्रंथ-लघुग्रंथ यांची निर्मिती झाली असून अन्य सुमारे ५ सहस्रांहून अधिक आध्यात्मिक ग्रंंथांच्या निर्मितीची प्रक्रिया अधिक वेगाने होण्यासाठी अनेकांच्या साहाय्याची आवश्यकता आहे. आपली आवड आणि क्षमता यांनुसार लिखाणाचे संकलन, संरचना आणि विविध भाषांत भाषांतर करणे इत्यादी ग्रंथनिर्मितीच्या कार्यात आपण हातभार लावू शकता.
१. सनातनच्या आगामी ग्रंथांचे काही विषय
परात्पर गुरु डॉ. आठवले संकलित करत असलेल्या ग्रंथांचे साधारण विषय आणि संभाव्य ग्रंथसंख्या यांची सूची या पृष्ठाच्या खालील भागात दिली आहे. आज परात्पर गुरु डॉ. आठवले संकलित करत असलेल्या ५ सहस्र ग्रंथांपैकी केवळ ४९ ग्रंथमालिकेच्या विषयांची (एकूण १ सहस्र ८२३ ग्रंथसंख्येची) सूची प्रकाशित करत आहोत. प्रस्तुत सूची वाचून आपल्यापैकी कुणाचा एखाद्या किंवा काही विषयांच्या संदर्भात अभ्यास असेल, तर अशा ग्रंथांच्या प्राथमिक संकलनासाठी आपण निश्‍चित वेळ देऊ शकता, तसेच आपल्या परिचितांपैकी या विषयांचे जाणकार असतील, तर त्यांनाही या ग्रंथसेवेत सहभागी होण्याविषयी आपण आवाहन करू शकता. हाच उद्देश ठेवून ही सूची आम्ही प्रकाशित करत आहोत.
भावी युद्धकाळाच्या पूर्वी या सर्व ग्रंथांचे प्राथमिक संकलन झाले, तर युद्धाकाळानंतरच्या भावी पिढीला या ग्रंथांचा प्रत्यक्ष लाभ घेता येईल.
१ अ. सनातनच्या ग्रंथांचे महत्त्व : ‘वेद, उपनिषदे, पुराणे आदी धर्मग्रंथ गेली सहस्रो वर्षे मार्गदर्शन करत आहेत, तसेच सनातनचे ग्रंथ पुढे सहस्रो वर्षे मानवजातीला मार्गदर्शन करतील’, असा आशीर्वाद एका संतांनी दिला आहे.
२. ग्रंथनिर्मितीच्या कार्यात सहभागी होऊ इच्छिणार्‍यांसाठी उपलब्ध असलेल्या विविध सेवा
२ अ. लिखाणाचे संगणकीय टंकलेखन करणे, पडताळणे आणि संकलन करणे : संगणकावर टंकलेखन करणे आणि टंकलेखन केल्यावर ‘ते टंकलेखन व्यवस्थित झाले आहे का ?’, हे मूळ लिखाणावरून पडताळणे आणि लिखाणाचे संकलन करणे.
२ अ १. आवश्यक कौशल्य : संगणकावर टंकलेखन करता येणे, तसेच मराठी, हिंदी किंवा इंग्रजी भाषांचे व्याकरण आणि शब्दरचना यांचे ज्ञान असणे.
२ आ. लिखाणातील संस्कृत वचने आणि श्‍लोक आदी पडताळणे : ग्रंथांतील लिखाणात आलेले संस्कृत श्‍लोक, वचने आणि सुभाषिते पडताळणे; त्यांचा मूळ संदर्भ लिहिणे; त्यांचा अर्थ लिहिणे आदी सेवा यात अंतर्भूत आहेत. यासाठी साधकाला संस्कृत भाषेचे थोडेफार ज्ञान असणे आवश्यक आहे. संस्कृत भाषेचे थोडेफार ज्ञान नसल्यास तेवढे लिखाण सोडून इतर लिखाण अंतिम करणे.
२ इ. मराठी, तसेच अन्य भाषांतील ग्रंथांचे संकलन करणे
२ इ १. विविध सेवा
अ. ज्या विषयावरील ग्रंथ करणार, त्या विषयाच्या विविध सूत्रांच्या मथळ्यांवरून विषयाची अनुक्रमणिका सिद्ध करणे.
आ. अनुक्रमणिकेनुसार लिखाण लावून त्या लिखाणाचे अंतिम संकलन करणे.
इ. सर्वसाधारणपणे १०० पृष्ठांचा (५०० केबीचा) एक ग्रंथ होतो. लिखाणावरून ‘ग्रंथांची किती पृष्ठे होतात’, हे पहाणे आणि पृष्ठसंख्येचा अंदाज घेऊन ग्रंथाचे २, ३, … अशा भागांमध्ये ग्रंथाचे विभाजन करणे.
ई. प्रत्येक भागाच्या अनुक्रमणिका आणि मनोगत सिद्ध करणे.
उ. प्रत्येक भागाचे मुखपृष्ठ आणि मलपृष्ठ यांवरील लिखाण सिद्ध करणे.
२ ई. विविध भाषांतील ग्रंथ आणि लघुग्रंथ यांची संगणकीय संरचना करणे, तसेच ग्रंथांत छापण्यासाठी सारण्या (टेबल) सिद्ध करणे : यासाठी ‘इन-डिझाईन’ या संगणकीय प्रणालीचे ज्ञान असावे.
२ उ. मराठी, हिंदी, कन्नड किंवा इंग्रजी भाषांतील ग्रंथांचे अन्य देशी-विदेशी भाषांत भाषांतर करणे : मराठी, हिंदी, कन्नड किंवा इंग्रजी या भाषेत ग्रंथ उपलब्ध आहेत. ही सेवा करण्यासाठी ‘आपण ज्या भाषेत भाषांतर करू इच्छिता’, त्या भाषेचे व्याकरणदृष्ट्या उचित ज्ञान असणे आवश्यक आहे. अशांनीही आपली नावे कळवावीत. भाषेचे ज्ञान असेल; परंतु व्याकरणदृष्ट्या विशेष ज्ञान नसेल, तर त्यासंदर्भात प्रशिक्षण घ्यावे. संगणकीय ज्ञान (मराठीतील लिखाणाचे इंग्रजी भाषेत भाषांतर करण्याच्या सेवेसाठी MsWord आणि PDF या प्रणालींचे ज्ञान हवे.)
३. ग्रंथनिर्मितीच्या कार्यात सहभागी होण्यासाठी संपर्क करा !
वरील सर्व सेवांसाठी संगणकाचे जुजबी ज्ञान असणे, तसेच संगणकीय टंकलेखन करता येणे आवश्यक आहे. वर उल्लेखिलेल्या सेवा सनातनच्या आश्रमात राहून किंवा घरी राहूनही करता येतील. ग्रंथ-निर्मितीशी संबंधित सेवा शिकण्यासाठी इच्छुकांना सनातनच्या आश्रमात २-३ आठवडे रहाता येईल. पुढे आश्रमात राहून किंवा घरी राहूनही सेवा करता येतील.
या सेवा करू इच्छिणार्‍यांनी जिल्हासेवकांच्या माध्यमातून पुढील सारणीनुसार आपली माहिती सौ. भाग्यश्री सावंत यांच्या नावे sankalak.goa@gmail.com या संगणकीय पत्त्यावर अथवा पुढील टपाल पत्त्यावर पाठवावी.
टपालासाठी पत्ता : सौ. भाग्यश्री सावंत, द्वारा ‘सनातन आश्रम’, रामनाथी, फोंडा, गोवा. पिन – ४०३ ४०१
– (पू.) श्री. संदीप आळशी, सनातन आश्रम, रामनाथी, गोवा. (२६.५.२०२१)
परात्पर गुरु डॉ. आठवले संकलित धर्म, अध्यात्म आणि साधना यांच्याशी संबंधित ४९ विषयांवरील ग्रंथमालिका !
वाचकांना निवेदन : सनातनच्या संभाव्य ५ सहस्र ग्रंथांपैकी ४९ ग्रंथमालिकांच्या विषयांची (एकूण १ सहस्र ८२३ ग्रंथसंख्येची) सूची आज प्रकाशित करण्यात आली आहे. उर्वरित सूची पुढील रविवारी १३.६.२०२१ या दिवशी प्रकाशित करण्यात येणार आहे.
