बेळगाव येथील संत साहित्याचे गाढे अभ्यासक प.पू. डॉ. वा.पु. गिंडे महाराज यांचा देहत्याग !

संतसाहित्यावर विपुल लिखाण करून अध्यात्माचे ज्ञानामृत समाजाला देणारे प.पू. डॉ. गिंडे महाराज यांच्या चरणी कोटीशः कृतज्ञता !

‘प.पू. डॉ. गिंडे महाराज हे संतसाहित्याचे गाढे अभ्यासक होते. त्यांना वाङ्मयात डॉक्टरेट मिळाली होती. साहित्यक्षेत्रात दिलेल्या योगदानामुळे त्यांना विविध पुरस्कारांनी सन्मानित करण्यात आले. समाजात नावलौकिक असूनही ते अतिशय विनम्र होते. प.पू. डॉ. गिंडे महाराज यांनी संसारात राहून साधना केली आणि संतपद गाठले. असे करणे पुष्कळ कठीण असते; मात्र त्यांनी ते साध्य केले. ते नेहमी म्हणत, ‘ज्ञानेश्‍वरीने मला जगण्याचे प्रयोजन आणि बळ दिले.’ त्यांनी ज्ञानेश्‍वरी केवळ अभ्यासली नाही, तर त्यातील शिकवणीनुसार आचरणही केले. त्यांनी समाजप्रबोधनाचेही कार्य केले. अध्यात्मातील ज्ञानामृताचा समाजाला लाभ व्हावा आणि सर्वांनी साधना करावी, यासाठी त्यांनी ठिकठिकाणी व्याख्याने अन् प्रवचने घेतली. ते आदर्श शिक्षकही होते. पुढील पिढी सशक्त आणि सुसंस्कारी व्हावी, अशी त्यांना तळमळ होती.

प.पू. डॉ. गिंडे महाराज यांचे सनातन संस्था आणि हिंदु जनजागृती समिती यांच्याशी जिव्हाळ्याचे संबंध होते. ते अधूनमधून रामनाथी (गोवा) येथील सनातनच्या आश्रमात वास्तव्याला येत. ‘रामनाथी आश्रमात आल्यावर मला माहेरी आल्यासारखे वाटते’, असे ते सांगत. त्यांनी सनातनच्या साधकांना भरभरून प्रेम दिले.

ज्ञानवंत असूनही समाजाला कळेल, अशा सोप्या भाषेत अध्यात्माचा प्रसार करणारे प.पू. डॉ. गिंडे महाराज यांच्याविषयी कितीही कृतज्ञता व्यक्त केली, तरी ती अल्पच आहे. त्यांनी दाखवलेल्या मार्गानुसार साधना करणे, हीच त्यांच्याप्रती खरी श्रद्धांजली ठरेल !’

– (परात्पर गुरु) डॉ. जयंत आठवले, संस्थापक, सनातन संस्था.