सांगली जिल्ह्यातील ‘आयसेरा बायोलॉजिकल’ आस्थापनाने सिद्ध केलेली कोरोनावरील लस परिणामकारक असल्याचा दावा

सांगली – कोरोनाच्या दुसर्‍या लाटेने गंभीर स्वरूप धारण केले आहे. लसींचा तुटवडा जाणवत असून लसीकरणाचा वेग वाढवणे आवश्यक आहे. जिल्ह्यातील शिराळा येथील ‘आयसेरा बायोलॉजीकल’ या औषध निर्माण आस्थापनाने निर्माण केलेल्या लसीचे एक अथवा दोन डोस दिल्यास कोरोना रुग्ण ठणठणीत बरा होईल, असा दावा आस्थापनाने केला आहे. ‘अँटीकोव्हिड सीरम’ असे या लसीचे नाव आहे. कोरोनाच्या कोणत्याही विषाणूवर हे इंजेक्शन परिणामकारक असल्याचा आस्थापनाचा दावा आहे.

१. कोरोनाचे विषाणू घोड्याच्या शरीरात टोचून त्याच्या शरीरात अँटिबॉडीज सिद्ध करायच्या. त्यांनतर घोड्याच्या रक्तातील ‘अँटीसेरा’ काढून सिद्ध केलेली लस कोरोना रुग्णांना द्यायची इतकी सोपी प्रक्रिया असल्याची माहिती ‘आयसेरा बायोलॉजीकल’चे संचालक दिलीप कुलकर्णी आणि नंदकुमार कदम यांनी दिली.

२. या लसीच्या प्राण्यांवरील चाचण्या यशस्वी झाल्या असून मानवी वापरासाठीच्या चाचणीसाठी ‘आय.सी.एम्.आर्.’च्या अनुमतीची प्रतीक्षा आहे.

३. शिराळा मतदार संघाचे खासदार धैर्यशील माने याचा पाठपुरावा करत असून त्यांनी पंतप्रधान नरेंद्र मोदी आणि राज्याचे मुख्यमंत्री उद्धव ठाकरे यांच्याकडे पत्रव्यवहार केला आहे.

४. ‘आयसेरा बायोलॉजिकल’ आस्थापनाने या लसीचे ३ लाख डोस सिद्ध करून ठेवले असून मानवी चाचणी यशस्वी झाल्यास एका मासात ९ लाख डोस सिद्ध करण्याची आस्थापनाची सिद्धता असल्याची माहिती संचालक दिलीप कुलकर्णी यांनी दिली.

५. लस सिद्ध करण्यासाठी ‘सीरम इन्स्टिट्यूट’ आणि ‘प्रीमियम सीरम्स अँड व्हॅक्सिन्स लिमिटेड, नारायणगाव’ या दोन आस्थापनांनी मोठे साहाय्य अन् मार्गदर्शन केल्यामुळे ४ मासांत ही लस सिद्ध झाली, अशी माहिती संचालक नंदकुमार कदम यांनी दिली.