उत्तर कोपर्डे (जिल्हा सातारा) येथील खासगी सावकारी करणार्यास अटक
सातारा, १५ मार्च (वार्ता.) – कराड तालुक्यातील शहापूर येथील एकास अनधिकृतपणे २० टक्के व्याजदर आकारून कर्ज देणार्या खासगी सावकारास उंब्रज पोलिसांनी अटक केली आहे.
कराड तालुक्यातील उत्तर कोपर्डे येथील अनधिकृतपणे खासगी सावकारी करणारे विजय उपाख्य विराट विलास चव्हाण हे लोकांना प्रतिमास २० टक्के व्याजदराने कर्ज देत असत. तसेच कर्जाचा हप्ता चुकल्यास प्रतिदिन चक्रवाढ व्याज लागू करत असत. तसेच बळजोरीने ते लोकांकडून वसूल करत असत. चव्हाण यांच्याविरोधात शहापूर येथील प्रसाद गजानन खेडकर यांनी उंब्रज पोलीस ठाण्यात तक्रार दिली. त्यानुसार उंब्रज पोलिसांनी चव्हाण यांना अटक करून न्यायालयात उपस्थित केले. न्यायालयाने चव्हाण यांना १७ मार्चपर्यंत पोलीस कोठडीत ठेवण्याचे आदेश दिले आहेत.