राष्ट्रध्वजाचा अवमान होऊ नये, यासाठी प्रबोधन करा !
सिंधुदुर्गातील प्राथमिक आणि माध्यमिक शाळांना शिक्षणाधिकार्‍यांच्या सूचना
सिंधुदुर्ग – जिल्हा परिषद प्राथमिक शिक्षणाधिकारी एकनाथ आंबोकर आणि माध्यमिक शिक्षणाधिकारी अशोक कडूस यांनी जिल्ह्यातील सर्व प्राथमिक आणि माध्यमिक शाळांना २६ जानेवारी या प्रजासत्ताकदिनी राष्ट्रध्वजाचा अवमान होणार नाही, याविषयी प्रबोधन करण्यासह ध्वजारोहणाचा कार्यक्रम करण्याविषयी मार्गदर्शक सूचना दिल्या आहेत.
या सूचना पुढीलप्रमाणे …
१. ध्वजारोहण कार्यक्रमाच्या वेळी कोरोनाविषयीचे सर्व नियम आणि निर्देश यांचे काटेकोरपणे पालन करण्यात यावे. प्रत्येकाने मास्क लावावा आणि सामाजिक अंतर पाळावे.
२. प्रजासत्ताकदिनाच्या निमित्ताने प्रभातफेरी, सांस्कृतिक कार्यक्रम किंवा विविध खेळांचे आयोजन करू नये. सामाजिक माध्यमांद्वारे निवडक विद्यार्थी, विद्यार्थिनी यांची देशभक्तीपर गाणी आणि भाषणे आयोजित करावीत. ऑनलाईन कार्यक्रम किंवा त्या पद्धतीने विविध प्रकारच्या स्पर्धांचे आयोजन करावे.
३. ध्वजसंहितेचे पालन करावे. राष्ट्रध्वजाचा अवमान होणार नाही, याची दक्षता घ्यावी. विद्यार्थी आणि पालक यांच्याकडून राष्ट्रध्वजाचा अवमान होऊ नये, यासाठी आवश्यक प्रबोधन करावे, तसेच तिरंगी मास्क आणि प्लास्टिकचे राष्ट्रध्वज खरेदी न करण्याविषयी प्रबोधन करावे, अशा मार्गदर्शक सूचना या वेळी करण्यात आल्या आहेत.