अमली पदार्थांसह ३ जण आणि मर्सिडीस गाडी घेतली कह्यात
पोलिसांची सलग तिसर्‍या दिवशी अमली पदार्थांच्या विरोधात मोठी कारवाई
पणजी, २७ डिसेंबर (वार्ता.) – गुन्हे अन्वेषण विभागाने दोनापावला येथे २६ डिसेंबरच्या रात्री धाड टाकून मुंबईस्थित स्ट्रोमे कॅनडी आणि व्हेलेंटाईन परेरा, तसेच भाग्यनगरस्थित आयन अली खान यांना ८ लाख ५० सहस्र रुपये किमतीच्या अमली पदार्थांसह कह्यात घेतले आहे. पोलिसांनी सलग तिसर्‍या दिवशी अमली पदार्थांच्या विरोधात ही मोठी कारवाई केली आहे. हे अमली पदार्थ ‘मर्सिडीस बेंझ’ गाडीत लपवून ठेवले होते. पोलिसांनी या कारवाईत ‘मर्सिडीस बेंझ’ गाडीही कह्यात घेतली आहे.
सासष्टी तालुक्यात अमली पदार्थांचे सेवन करण्याचे वाढते प्रकार !
सासष्टी तालुक्यात अमली पदार्थांचे सेवन करण्याचे वाढते प्रकार घडत आहेत. कोलवा, मडगाव आणि फातोर्डा पोलीस ठाण्यांच्या हद्दीत हे प्रकार घडत आहेत. या भागांमध्ये गांजाची विक्री सर्रासपणे चालू असल्याचा आरोप होत आहे. चालू वर्षी २५ डिसेंबरपर्यंत सासष्टी पोलिसांनी अमली पदार्थांच्या विरोधात १९ प्रकरणे नोंद केली आहेत, तर गतवर्षी ३५ प्रकरणांची नोंद झाली होती